தேர்தல் விதிகள் – தெரிந்து கொள்வோம்!

தேர்தல் விதிகள் – தெரிந்து கொள்வோம்!

விதி எண்: 49 - M

வாக்கு அளிக்கின்ற அனைத்து வாக்காளரும் 'நான் வாக்களிக்கும் ரகசியத்தை கண்டிப்பாக பின்பற்றுவேன்' என '17 ஏ' படிவத்தில் கையொப்பமிட வேண்டும். இவ்வாறு கையெழுத்திட்டபின் மற்ற நடைமுறையை பின்பற்ற மறுத்தால் அவர் ஓட்டு போட பிரிவு '49 M' கீழ் அனுமதிக்கக்கூடாது. அவ்வாறான இனங்களில் '17 ஏ' பதிவேட்டில் குறிப்பு பகுதியில் வாக்கு அளிக்க அனுமதிக்கப்படவில்லை; ஓட்டுப்பதிவு நடைமுறை மீறப்பட்டது என குறிப்பிட வேண்டும். அந்தப் பதிவின் கீழ் ஓட்டுச்சாவடி தலைமை அலுவலர் தனது முழு கையொப்பமிட வேண்டும்.

விதி எண்: 49 – N  உதவியாளருடன் செல்லலாம்!

பார்வையற்றோர் மற்றும் உடல் நலிவடைந்தோர் விதி எண்  '49 - N' –ன்படி உதவியாளர் ஒருவர் உதவியுடன் வருகை தந்து வாக்கு அளிக்கலாம்.  ஆனால், அந்த உதவியாளர் 18 வயதுக்கு குறையாதவராக இருக்க வேண்டும். அவரிடம் அவர் அழைத்து வந்த வாக்காளர் சார்பில் பதிவு செய்த ஓட்டின் ரகசியத்தை நான் காப்பாற்றுவேன்! என்றும், அந்த நாளில் வேறு ஓட்டுச் சாவடிகளில் வேறு யாருக்கும் உதவியாளராக நான் செயல்படவில்லை என்றும் உறுதிமொழி பெற வேண்டும்.

விதி எண் : '49 -O'  ஓட்டளிக்காவிட்டால் ?

ஒவ்வொரு வாக்காளர்களும் அடையாளம் சரிபார்க்கப்பட்டு 17 ஏ பதிவேட்டில் கையெழுத்திட அழைக்கப்படுவார்கள். கையெழுத்திட்ட பின்னர் அந்த வாக்காளர் வாக்களிக்க அனுமதிக்கப்படுவார். அடையாளம் சரிபார்க்கப்பட்ட பின்னர் ஒரு வாக்காளர் '17 ஏ' பதிவேட்டில் கையொப்பமிட்ட பின் வாக்களிக்க வேண்டாம் என்று முடிவு செய்தால் வாக்குப்பதிவு செய்யும்படி அவரை யாரும் கட்டாயப்படுத்தக் கூடாது. அதற்குப் பதிலாக 17 ஏ பதிவேட்டில் அவரது வரிசை எண்ணுக்கு எதிரே குறிப்புரையில் வாக்களிக்க மறுத்தார்; வாக்களிக்காமல் சென்றார் என பதிவு செய்து அதில் ஓட்டுச்சாவடி தலைமை அலுவலர் அவரது முழு கையெழுத்திட வேண்டும்.

'டெண்டர்டு' ஓட்டு என்றால் என்ன?

ஓட்டுச்சாவடியில் ஒருவர் வாக்கை மற்றொருவர் தவறுதலாக போட்டுவிட்டு சென்றிருந்தால் வாக்களிக்க வந்த வாக்காளரின் அடையாளச் சான்றுகளை சரி பார்த்த பின் ஆய்வுக்குரிய வாக்குச்சீட்டு வழியே அவரை வாக்களிக்க அனுமதிக்கவேண்டும். ஆனால், அவரை ஓட்டுப்பதிவு இயந்திரம் மூலம் வாக்களிக்க அனுமதிக்கக் கூடாது. அந்த வாக்காளர் ஆய்வுக்குரிய வாக்குச் சீட்டை பெற்று ரப்பர் முத்திரையை பயன்படுத்தி வாக்குப் பதிவு செய்ய வேண்டும். அந்த வாக்குச்சீட்டை வாக்குச்சாவடி தலைமை அலுவலரிடம் ஒப்படைக்க வேண்டும். இவ்வாறு அளிக்கப்படும் வாக்கு ஆய்வுக்குரிய வாக்கு அல்லது 'டெண்டர்டு ஓட்டு' எனப்படுகிறது.

'சேலஞ்ச்' ஓட் என்றால் என்ன?

வாக்குச்சாவடியில் இருக்கின்ற வேட்பாளர்களின் முகவர்கள் யாராவது வாக்களிக்க வரும் வாக்காளர்களின் அடையாளம் குறித்து எதிர்ப்பு தெரிவித்தால், எதிர்ப்பு தெரிவித்த முகவர் தேர்தல் அலுவலரிடம் ஒவ்வொரு நிகழ்வுக்கும் இரண்டு ரூபாய் கட்டணம் செலுத்த வேண்டும். அந்த முகவரின் எதிர்ப்பு குறித்து வாக்குச்சாவரி அதிகாரியால் முழு விசாரணை நடத்த வேண்டும். எதிர்ப்பு நிரூபிக்கப்படவில்லை என்றால் அந்த வாக்காளரை வாக்களிக்க அனுமதிக்க வேண்டும். ஆள் மாறாட்டம் உண்மை என்று நிரூபிக்கப்பட்டால், அந்த மோசடி நபரை காவல் துறையினரிடம் ஒப்படைக்க வேண்டும்.

'டெஸ்ட் ஓட்டு' என்றால் என்ன?

வாக்குப்பதிவு இயந்திரத்தில் தான் வாக்களித்த சின்னம் தெரியாமல் வேறு ஒரு சின்னமும் பெயரும் தெரிவதாக ஒரு வாக்காளர் கூறினால் அவரிடம் தேர்தல் நடத்தை விதி '49 M - ஏ' துணை விதியின் கீழ் உரிய படிவத்தில் உறுதிமொழியை பெற்றுக் கொள்ள வேண்டும்.அதன்பின் வாக்குச்சாவடி தலைமை அலுவலர் வாக்குச்சாவடி அலுவலர்களுடன்  வாக்களிப்பு பகுதிக்கு சென்று அந்த வாக்காளரை மீண்டும் முகவர்கள் முன் ஒரு வாக்கை பதிவு செய்ய அனுமதிக்க வேண்டும்.

அந்த வாக்காளர் எந்த வேட்பாளருக்கு, எந்த சின்னத்தில் வாக்களித்தார் என்பதை '17 - ஏ' மற்றும் '17 - சி' பதிவேட்டில் பதிவு செய்யவேண்டும். ஒரு வேளை அவர் பதிவு செய்த ஓட்டு சரியாக பதிவாகி இருந்தால், வாக்காளர் வேண்டுமென்றே தவறான புகார் கொடுத்ததாக இந்திய தண்டணைச் சட்டம், பிரிவு 182ன்படி அவர் தண்டனைக்குரியவராவார். அந்த வாக்காளரை உடனடியாக காவல் துறையினரிடம் ஒப்படைக்க வேண்டும். அவருக்கு ஆறு மாதம் சிறை தண்டனை அல்லது 1000 ரூபாய் அபராதம் அல்லது இரண்டும் சேர்ந்து அனுபவிக்க வேண்டும்.

வாக்காளர்  புகார் அளித்தது போல் ஓட்டளித்த சின்னம் மற்றும் நபர் விபரங்கள் ஒளிராமல் வேறு சின்னங்களும் வேட்பாளரும் இயந்திரத்தில் ஒளிர்ந்தால் வாக்குச்சாவடி அலுவலர் ஓட்டுப்பதிவை உடனே நிறுத்த வேண்டும். உடனடியாக மண்டல தேர்தல் அலுவலருக்கு, தகவல் தெரிவிக்க வேண்டும்.

 *********************************************** செல்வம் பழனிச்சாமி, 18.04.2019