பிழைகளை நீக்கி, புதிய மின்னணு குடும்ப அட்டை பெற

பிழைகளை நீக்கி, புதிய மின்னணு குடும்ப அட்டை பெற

மின்னணு குடும்ப அட்டை தொலைந்து போனாலோ அல்லது சேதமடைந்து பயன்படுத்த முடியாத நிலையில் இருந்தாலோ அரசு இசேவை மையங்கள் மூலம் பொதுமக்கள் மாற்று அட்டை பெறலாம் என அறிவிக்கப்பட்டுள்ளது.

இது குறித்து தமிழக அரசு திங்கட்கிழமை வெளியிட்ட அறிவிப்பு:

தலைமைச் செயலகம், தமிழகத்திலுள்ள அனைத்து மாவட்ட ஆட்சியர் அலுவலகங்கள், வட்டாட்சியர் அலுவலகங்கள், சென்னை பெருநகர மாநகராட்சி தலைமை அலுவலகம், மாநகராட்சியின் மண்டல அலுவலகங்கள், கோட்ட அலுவலகங்கள் ஆகிய இடங்களில் செயல்படும் இசேவை மையங்களில் பொதுமக்கள் மாற்று மின்னணு குடும்ப அட்டையை பெற்றுக் கொள்ளலாம்.

இதற்கு பழைய மின்னணு குடும்ப அட்டையில் பதிவு செய்துள்ள செல்போன் எண் மிக அவசியம் ஆகும். அந்த எண்ணுக்கு (One Time Password) ஒருமுறை பயன்படுத்தக்கூடிய கடவுச்சொல் அனுப்ப்ப்படும். அந்த கடவுச் சொல்லை பயன்படுத்தி, புதிய மின்னணு குடும்ப அட்டை அவர்களுக்கு வழங்கப்படும். பழைய மின்னணு குடும்ப அட்டையில் பதிவு செய்த செல்போன் எண் தெரியாதவர்களுக்கு புதிய மின்னணு குடும்ப அட்டை வழங்க இயலாது.

புதிய மின்னணு குடும்ப அட்டையில் உள்ள விபரங்களை திருத்தும் பணி மேற்கூறிய இசேவை மையங்களில் தற்போது நடைபெற்று வருகிறது. அங்கு பொதுமக்கள் புதிய மின்னணு குடும்ப அட்டையில் குடும்ப உறுப்பினர்களின் பெயரை நீக்குதல் மற்றும் மாற்றம் செய்தல், குடும்ப அட்டையின் வகையை மாற்றம் செய்தல், கேஸ் சிலிண்டர் விபரங்களை மாற்றம் செய்தல், முகவரி மாற்றம் செய்தல் போன்ற சேவைக்காக 60 ரூபாய் செலுத்தி விண்ணப்பித்து வருகின்றனர்.

இந்த நிலையில் தற்போது அந்த விண்ணப்பங்களுக்கு சம்பந்தப்பட்ட வட்ட வழங்கல் அலுவலர் அவர்கள் ஒப்புதல் அளித்த பிறகு விண்ணப்பித்தவரது செல்போனுக்கு ஒரு குறுஞ்செய்தி அனுப்பப்படும். குறுஞ்செய்தி கிடைக்கப் பெற்றவர்கள் அருகிலுள்ள இசேவை மையத்தை அணுகி 30 ரூபாய் செலுத்தி திருத்தப்பட்ட புதிய மின்னணு குடும்ப அட்டைகளை பெற்றுக் கொள்ளலாம்.

மேற்கூறிய இரண்டு சேவைகளும் 20.06.2017 முதல் நடைமுறைக்கு வருகின்றது. இந்த சேவை தொடர்பாக புகார் அளிக்க வேண்டும் என்றால், 1800 425 2911 என்ற கட்டணமில்லா தொலைபேசி எண்ணுக்கு தொடர்பு கொண்டு தெரிவிக்கலாம்.

நன்றி : தினமணி நாளிதழ் – 20.06.2017